Man ende een wyf ghecleet up zij boerssche

Man ende een wyf ghecleet up zij boerssche. ca. 1575.
Uitgegeven door drs. G.C. van Uitert
Red. dr. A.J.E. Harmsen, Universiteit Leiden.
In: Nederlandse kluchten, tafelspelen, Nederlandse en Franse spreuken en refreinen. Rekeningen van Daneel Theysbaert te Wachtebeke, 1570-1578. UBGent: Ms. no. 901 : 2.
Ceneton10465 - UBGent

Een tafelspeelken van twee personagien
eenen man ende een wyf ghecleet up zy
boerssche

Dwyf van buten met eenen
zac upden hals, beghint

Waer zydy han hannen

Den man van buten met eenen
eyer paendere

En hannent niet vele

Comt men licht hier de cannen
Waer zydy han hannen
[fol. 10r]

(5) Ic wilde ghy waert ghebannen
versmachten moet u kele

Waer zydy han hannen

En hannent niet vele
of zeghdyt in spele hoe stady en tiert
(10) Roept niet zo luyde

Wat dezen loeten versiert
Sydy al bebiert wat zuldy hier brauwen
En heetty niet hannen

Hannen neen ic in trauwen
Hannen en was noynt myn rechte name

Tes ooc waerachtigh twaer voor u een blame
(15) want hannen es een zot met curten verhale

Een hans es een duutssche en hackino en wale
hoe zal ic dan heeten ic en weets niet bylo.

Een hanneken es een kint en Jan wyo
Dus mueghdy wel Jan heeten up elc termyn

Wat es wyoe te zegghen

[fol. 10v]
(20) Cuendy gheen lattyn
Zo en zuldy dat woordeken niet verstaen
Dat ghy zo zult

Ic latyn cuenen swa neen ic waen
Zoudic latyn in den coestal gheleert hebben
Ic mach altemet den harync ghekeert hebben

(25) Waer Int cloostere

Ke neen, up eenen roostere
waer keert smen anders ha sufte ghye

En als ghy twee butten cocht ghy brochter drye
Dus moester proffyt in u huus ghewerden

Hoe es datte mueghelic

(30) Ghy waert den derden
want ghy zyt al buttachtich zoot mach blycken

Myn heren zy wilt my by eenen but ghelycken
Eyst niet jent dat zy met haren man gaet gecken
Maer de vrauwen moeten altoes anebecken,
(35) En tlaetste behauwen vander tale.

[fol. 11r]
Ghy spreict quaet vlaemsch alen zydy gheen wale
secht de mans willen altyts de vrauwen duercaerden

Wa jen zy en willen de vrauwen draghen zom baerden
Daeromme willen zy boven binden zonder ontvlien

(40) Draghen zy baerden

Ja zy ic hebt ghezien
Eyst wonder dat de werelt gheheel gaet verdraeyt

Ke zwycht, stopt uwen bec hoe stady en craeyt
Ic hoore wel, ghy meent u dynghen int vuile

De vrauwen draghen baerden an hare nuyle
(45) Es datte vuil laet varen u snatterynghe
ic zout doen blycken

Welcke taterynghe
hebben de vrauwen nuylen waer syn u sinnen

En hebben zy gheen mulen die cattinnen
Daer zy baerden an draghen, in reynder vauwen
(50) Ic wedde Ja zy

[fol. 11v]
Syn cattinnen vrauwen
wat caut es my datte spreict by manieren

Tzyn de vrauwen van de caters by gans bieren
Blycket niet in de maerte tesser al te verhoene
Elc wilt een vrauwe hebben

Wat heift men te doene
(55) met zulcken caut tschynt dat ghy al zot zyt

Fy clemme my dynct dat ghy al besnot zyt
Vaecht uwe nueze af - zuucht het zoch

Wyf tastende naer haren nueze

Wat ghebreict u an mynen nueze

Ja tes waer, ghy hebten noch
stonde dien nueze niet u caken ontrent
(60) u schoon aensicht ware met allen gheschent
Tes eenen schoonen blusscher meerder dan zom

Wat ghebreict u an mynen nueze

stonde hy niet stom
Ic en zouden niet gheven om eenen ducaet

[fol. 12r]
Kyct welc eenen fraeyen nueze dat daer staet
(65) Ic hadde my liever zulc eenen nueze ghezact

Al es mynen nueze gerompelt hy lach ghepact
even in de mande als wy eerst overquamen

Hy is swinters al blau ic soude my schamen
Zulc eenen nueze te draghen want hy te snode es

(70) De vrauwen prysen altyts dat root es
Hy wert root als ic dryncke crabbeleere

Waen Jan ghy syt een aerm brabbeleere
Ghy hebt altoos in uwen nueze, zo ic zeye

Wat hebbic in mynen nueze

In u de papeye
(75) Van dat ic u eerst te trauwen begoeste

En ghy zyt deerlic ghequelt vanden schaephoeste
Van achter niesdy dats meerderen roy

Al waerdy met uwen nueze noch zo moy
Den mynen es genter ic wilt betoghen

[fol. 12v]
(80) Dats waer clemme haddy gheen verkens ooghen
ghy warlicht veil claerder dan een tyncke

Myn ooghskens zien claerder dan een vyncke
Ja veil claerder dan een cauken van een craeyken ziet

Ic wedde om een zesken, ghy en ziet dat draeyken niet
(85) Eyst wit of zwart willet my accorderen

Deis, sente Loys temptatie zal my tempteren
Tes ghenoech tes beter dat wy thuiswaert gaen

Ic hebbe mynen gughelroc just anghedaen
Dies moet ic wat ghuchelen dats verloren

(90) Myn heren, en wilt u niet stooren
Hy en es van den wysten niet, tblyct an zyn vyte

Holla, hoe gaepty alzo zuldy my byten
ghy hebt emmers een gente backtreye
En daermede zydy ooc wacker ghye
(95) In uwen mont en zal gheen coppe ghespin wassen

[fol. 13r]
Hoe zoude ment connen naer uwen zin ghepassen
Haddic godt gheweest ghy zout de vrou al anders maken sien

Tzou zonder twyfel zo gheschien
waert dat ic god ware, verstaet de reden zaen
(100) Ic zoude de braen stellen daer de schenen staen
zo en zoude men zo veel blau schenen niet steken
an stoelen en bancken

Hoort dien man spreken
heeft hy niet van kieribus nepen waende

Ende de buucken zoudic maken opengaende
(105) al met cnoppen hoort myn ontpluuc care
Ende alsser rammelynghe in den buuc ware
Zo zoudement cuuschen met een clotken

Myn hooren ruusschen
van zulk eenen clap twaer beter gheswegen
(110) Dan alzoo te rasene

Ende jeghen den reghen
Die de luden dicwils comt verdooft quellen
Zoudic elc mensche een bordessche up dooft stellen
en achter zoudic een cave noort of zuit drieghen,
om dat den doom vanden biere zoude uut vliegen
(115) Zo en zoude de brein zo vullic niet zyn versmoort

[fol. 13v]
Dats emmers wel zottelick verzindt

Ende voort
Moet ic u noch zegghen int platte ,, calle
Dat ic van elcx mont een Ratte ,, valle
Zo en dorftmen gheen catten daer toe haeuwen,
(120) Noch Ratten cruut coopen

By mynder trauwen
Ghy waert weerdich ghesmeten met vurte sleteren,
zoude ghy gods wercken willen verbeteren
wa willecom cochuut, wech, cust den brandere

Tes daeraf ghenouch nu up een andere
(125) Tes my leet hebbic messeght, tzy groot of cleene

Nu wel, twerdt varync hoogh tyt van scheene
Dus dat wy ghynghen twaer wel mynen wille

Kenne boeye, wy moeten noch gaen naer bentille
Tes Daer kermesse laet ons derwaert poghen

(130) Twaer schande zouden wy ons hier vertooghen
zonder een present te gheven dees heeren verheven
schuelter niet in den curf

[fol. 14r]
Daer es wat bleven

Nu zegt my watter inne es, up rechter minnen

Tjan daer es een hinne

(135) Een hinne zechdy

Hoe meendy dat ic lieghe

Haut den curf toe dat zy niet uut en vlieghe
Ic meende waerllyk dat zy ter maerct vercocht was
Maer tes noch tot hier ghebrocht es
Wy zullender hopic de eere mede bewaren

(140) ygo, dat peynsdic ooc

Rasch zonder sparen
groet dit lieve gheselschip jonstigh verweten

gans mierrentant ic hebbe myn sprake vergeten
groetse ghye ghy kuenet wel ter kuere

[fol. 14v]
Moet ic altoos ghequelt zyn met desen luere
(145) ghy heeren en belcht u niet van tsotte ghemoetsele
wy bieden u al tsamen een minelic groetsele,
ende brynghen u zonder yemand te stoorne
Een goede vette inne om te smoorene
Ende bidden u wiltse in dancke ontfanghen

(150) Wacht willicse uut trecken

Wacht laetse my langhen
ontbeyt hoe sta ic aldus en babbele
my dynct dat ic niet dan hoy en grabbele
deis hinne es te gheven ende niet te coope

Siet wel toe dat zy u niet en ontloope
(155) Want ic zouder om zyn een beschaemt catyf
fatse wel

Myn hande bernt an myn lyf
Ic en vintse niet eyst niet wel een plaghe

Daer es nochtans een hinne

Ic wildicse zaghe,
of ghevoelde, zo ware ic der zake vastere

(160) Laetse my tasten

[fol. 15r]
Nu tast hinne tastere
ghy en zullet niet bet dan icke duergronden

Ey wyfken lacht al vonden al vonden
Siet wat ic hier hebbe, en maect gheen gheschrey

Es dat een hinne

Neent tes een ey
(165) Hau ziet, dit zyn vremde miraculen
Zoude de hinne gheleyt hebben sonder cakelen
Ic en hoorde myn daghen noynt vremder clute

Daer was een Inne maer nu eysser ute
een ey wasser inne nu hebbic tverstant

(170) Daer was een Inne

Maer twas een ey my quant
Ent ey esser van een waer woirt niet gheloghen

Nu moeten wy de duecht vanden eye betoghen
of wy zullen hier teenegaer blyven in schande

Een ey maect veil spyse

[fol. 15v]
Jaet menegherande
(175) men maecter me goe supenen gheswollen met sap
en wittemoes

Ja en goede appelpap
ooc dienet zy zeer wel in taerten in vlaen

Een waffelken upden rooster ghebraen
curt gheyert en es niet te vermulene

(180) De vadden hoe beghinnen zy te huulene
Als zy wel gheeyert zyn men zoudeze zoucken

Sghelycx de craustelyn

En deyercoucken
Daer en zyn gheen graten in, ghezeyt goet ront

Een eyken ghebraden en es ooc niet onghesont
(185) Alstmen heit up zyn hollanssche mette botere

Van ghedopte eyers en krygh men niet den snotere
men verghelter wel af, dats dat ic pryse

De eyers dienen bycans tot alle spyze
Ende men cocse menichsins sout an den treyn gaen

[fol. 16r]
(190) Men cocse met booccruit,

Ja, en met reyn vaen
maer dats jeghen de vloeyen vul van ghequelle

Men roerse metten Ingune en metter pecelle
Dan maectmen appeltasseyen metten mostaerde

O de eyers zyn puicgoet van aerde
(195) De schippers als zy hebben den hongher bystere
zo maecken zy van eyers eenen vystere
inne baken vleesch ghebacken inde panne

maer als zy dan te zeer lichten de kanne
zo zouden zy wel schieten om te naest
(200) Den coc van vranckerycke

Duufkens met eyers ghefaest
en zyn ooc niet quaet dats goet te ghevroene
De eyers pleghen de lieden te voene
eenen sangher van eyers gheentyts eersch es

Men zecht dat een ey bloet en vleesch es
(205) binnen dry daghen zo ic ghepresen las
sghelycx ooc Christus ghebenedyt verresen was
binnen dry daghen tes een schoon exempele

[fol. 16v]
Hy hadde gheseyt breict dezen tempele
en binnen dry daghen zal ic hem verwecken

(210) Int uiterste oordeel up diverssche plecken
zal vanden menschen gheropen worden menich ey
Deen met blyschap ende dander met gheschrey
Leert hier up dyncken o menschelicke zinnen

En leert Christus uwen Zalichmaker beminnen
(215) Die ons met zyn precieus bloet ghecocht heift

Goede jonste die ons tot hier ghebrocht heift
hadde noch wel vonden ons presentatie

nemet doch danckelyc dat jonste ghewrocht heeft,
En blyft bevolen godts moghende gratie

Lanc ijc xiiij vs.

Continue