[CH1641:001]
BIBLIA M. DORPIAE DONO MISSA CAL. IAN. 1641
A BON JOUR BON AFFAIRE
LE PREMIER JOUR DE L’AN M. XLI. DC.
C. H. À. M. V. D.
FIT CE PLUS BEAU PRESENT DU CIEL
ET DE LA TERRE.
[CH1641:002]
IN OBITUM OTHONIS BAR. DE GENT TOPARCHAE DIDENII VEZALIAE
VICTORIS AC PRAEFECTI
Didenii Herois temere, Vezalia, ploras
Fessa triumphato condier ossa solo.
Ante duos et bis quinos ita voverat annos,
Hoc si non posset stare, jacere loco.
3. Ian.
[CH1641:003]
IN EUNDEM
Res hodie Patrum et nostro nova contigit aevo,
Civibus ingrata ac hostibus ac sociis.
Didenium intra se condi Vezalia, Galli,
Brittones, Batavi flent, et inultus Iber.
3. Ian.
[CH1641:004]
IN EFFIGIEM MEAM QUINQUE LIBERORUM VULTIBUS CINCTAM
Quo genus et formam Constanter, opesque et amoris
Imtempestivi spernat ubique faces,
Hugenium divâ privatum Conjuge Patrem
Hoc armaverunt Fata satellitio.
3. Ian.
[CH1641:005]
IN NUPTIAS POLLUCIS ET LYDIAE
Nobilis et formosa meo sua Lydia ducta
Polluci Logice est; ob Genus et Speciem.
4. Ian.
[CH1641:006]
EPITHALAMIUM ENNONIS FERENS ET IOANNAE HENDERSONIAE
Quam velit una caro communi nomine dici
Facta probat primâ nocte Ioanna ferens.
Mox, ubi conjugii fasces invaserit, esto
Tu quoque, si pacem diligis, Enno, ferens.
6. Ian.
[CH1641:007]
CONTRA SECUNDAS NUPTIAS
Uxorem sepeli; procul absis altera: par est
Cui par nulla fuit nulla secunda siet.
6. Ian.
[CH1641:008]
IN DIVINISSIMAS EFFIGIES ANUS ET PUELLAE AB INCERTA MANU
Si, quis homo post hos homines se condat Apelles,
Quaeris, homo. hoc primum dispice, num sit homo.
6. Ian.
[CH1641:009]
IN NUPTIAS PRINCIPUM GULIELMI AURIACI ET MARIAE BRITANNICAE
Quanti noster amor, quanti sit amica Britannis
Belgica Regali sanguine vincta, vide:
Inserimus duplici super aurea Lilia natae
Floribus argenteis aurea mala Rosae.
(5) Consule nunc oculos; num sit color aemulus isti;
Post oculos, nares consule, num sit odor.
7. Ian.
[CH1641:010]
DE TITO ET MAEVIA
Si quantum postica places antica placeres,
Iam mihi basiolo, Maevia, tacta fores:
Sic Titus a tergo praeeuntem punxit: at, inquit
Maevia, jam, Tite, da basium ubi placeo.
8. Ian.
[CH1641:011]
IN D. HEINSIJ SUPPRESSAM URINAM
Heinsiadae morbo gaudet Salmasius; ut quem
Omnia ferre, nihil reddere posse velit.
11. Ian.
[CH1641:012]
IN VESICAM EIDEM LAXATAM
Heinsiadae morbum flebit Salmasius, ut quem
Omnia comperiet reddere, ferre nihil.
[CH1641:013]
FORCEPS
Me coquus et fabri possint contemnere, si, quam
Ferrea sunt hominum corda, sit una manus.
11. Ian.
[CH1641:014]
SCOPAE FOCARIAE
Ut caleas, carbonis eges et cespitis usu:
Ut nitide caleas, me magis, hospes, eges.
12. Ian.
[CH1641:015]
SELLA QUADRUPES
Sessorum fulcire nates mea maxima; quid ni?
Maxima nobilium est gloria quadrupedum.
12. Ian.
[CH1641:016]
IN PRINCIPUM AURIACI ET AURIACAE EFFIGIES DOMI MEAE
Si domui non vana Laris tutela; quid isti
Cum Iunone Larem semper habere Iovem?
12. Ian.
[CH1641:017]
SOLEA FERRATA
Ferree Neptuni domitor, si saxeus obstat,
Obstantem ferro, Belga, natante doma.
13. Ian.
[CH1641:018]
EADEM ET CESPES UTILIS
Vincite, victores Batavi, brumam quoque: vincant
Frigora queis tellus ardet, arantur aquae?
15. Ian.
[CH1641:019]
EPHIPPIUM
Si, quadrupes generose, potes me ferre, ferendum
Sessorem dominum jam quoque, victe, puta.
15. Ian.
[CH1641:020]
LIGNUM
Sive focus, sive umbra placet; me stante, vel usto,
Bruma tepens, aestas frigida, neutra nocet.
15. Ian.
[CH1641:021]
(FORCEPS)
Nulla meis bipedum par est audacia coeptis,
Sive pedes hos vis dicere, sive manus.
16. Ian.
[CH1641:022]
MENSA
Lignea lusori, lectori lanea laudor,
Linea eis qui, non esse, nec esse putant.
16. Ian.
[CH1641:023]
LUPATUM
Ore reguntur equi: turpe est? hoc turpius, ipsos
Rectores bipedes hac quoque parte regi.
16. Ian.
[CH1641:024]
LUMINA FERREA CAMINO PRAEFIXA
Scutati flammas inter pugnate: puderet
Sumere, quae lateres non pudet, arma viros.
16. Ian.
[CH1641:025]
MENSA
Me schola declinat: sed enim quâ fronte, gulosi,
Quae vultis pueros posse, nequitis avi?
16. Ian.
[CH1641:026]
MANICA DE VULPINA PELLE
Haec saecli facies, emblemata temporis haec sunt;
Vulpinâ rapidas pelle latere manus.
16. Ian.
[CH1641:027]
FULCRA FOCARIA
Ut quid apricaris sublatâ veste, patenti
Crure? duos testes, nuda puella, cave.
16. Ian.
[CH1641:028]
CANDELA CANDELABRO INSERTA
Vis animae tardis sociatur vivida membris,
Qualis nostra gravi in corpore flamma micat.
16. Ian.
[CH1641:029]
TINTINNABULUM
Lingua mihi, lingua est dominae tam tinnula, ut ambas
Saepe, puer, mutas, saepe, marite, velis.
16. Ian.
[CH1641:030]
CHIROTHECA
Altera, si solem studeant arcere tenelli,
Altera, si Borean, haec epidermis erit.
16. Ian.
[CH1641:031]
AULAEA
Sordida splendidulis velatur aranea lanis:
Hic tuus, hic Aulae est, Quintiliane, color.
17. Ian.
[CH1641:032]
PARIETES AULAEIS TECTI
Si ruris Iove nimboso est praeclusa voluptas,
Huc, Here; textoris munere sylva sumus.
17. Ian.
[CH1641:033]
PELLIS URSINA. AD HERCULEM
Vana leonini est et pondus inutile tergi;
Ursinâ poteras pelle domâsse nivem.
17. Ian.
[CH1641:034]
SACCUS E PELLE URSINA FOVENDIS PEDIBUS
Nulla tibi victae debetur gratia brumae;
Quod nequeas sine me reddere, sacce, meum est.
17. Ian.
[CH1641:035]
IDEM
Non moror aetherios, quos nemo sentiit (?) ignes:
Certior in terris sub pede flamma latet.
17. Ian.
[CH1641:036]
IDEM EX PELLE LUPINA
Si vel, sacce, tuae similis sit gratia fratrum,
Non male nunc homini sic lupus esset homo.
17. Ian.
[CH1641:037]
TEGES FULTA PLUMIS ANSERINIS
Muta mei volucris melior custodia lecti est,
Quam Capitolinae garrula rupis erat.
17. Ian.
[CH1641:038]
IN PRAESTANTISSIMAM PICTURAM I. À CALCAR
Hoc volui, dictus proprio mihi nomine Calcar,
Post me cursuris addere calcar equis.
17. Ian.
[CH1641:039]
AD CARUM
Simne bonis avibus Sceuerino in littore pransus
Nescio, Care: bonis piscibus esse scio.
18. Ian.
[CH1641:040]
IN LENAM
Raptus in errorem quod gutturis alma mephitis
Posticae ructus instar erant violae,
Mammosae noctu contrectans ubera Lenae
Cotta, papillatas credidit esse nates.
18. Ian.
[CH1641:041]
PIER BRUIJGOM
Magre Pier trouwt bolle Bettje.
Dat’s een vettje!
18. Ian.
[CH1641:042]
SCOPAE VESTIARIAE
Quaerenti dudum visa est dubitare Batava,
Vestibus an scopis, virgo, carere velit.
19. Ian.
[CH1641:043]
CALCEUS
Si male cum pedibus sutori conuenit, arctus
In mediis etiam calceus urit aquis.
19. Ian.
[CH1641:044]
IDEM
Disce dolore meo moderatae prouidus esse
Cultor amicitiae: strictior urit amor.
19. Ian.
[CH1641:045]
FASCIA CRURALIS BYSSEA
Egregiam libertatem! sub more tyranno
In speciosa dari vincula nemo dolet.
19. Ian.
[CH1641:046]
ROSAE CALCEIS IMPOSITAE
Foetenti pede non temere contendo fuisse,
Qui primas calceis applicuere rosas.
20. Ian.
[CH1641:047]
CALIGAE BYSSEAE
Sit calor, ut color est, quasi nudae serica carnis
Pictorem possit fallere mollities.
20. Ian.
[CH1641:048]
CLATHRA IN FENESTRIS
Desine, fur, lacerare domum, spe vanus inani;
Ut vitream pellem fregeris, ossa tenent.
20. Ian.
[CH1641:049]
PILEUS
Mos monet in momenta caput nudare leuato
Tegmine: tempestas horrida stultitia est.
20. Ian.
[CH1641:050]
IDEM
Qui sibi adulantem dicunt de more salutem,
Corda velim fratres, non aperire caput.
20. Ian.
[CH1641:051]
IDEM
Par ratio est occurrenti nudare capillum,
Et patulâ intranti demere tecta domo.
20. Ian.
[CH1641:052]
PLUMAE IN PILEO
Non est ridiculus plumae mos; munere nostro
Pileus horrendae cassidis instar habet.
20. Ian.
[CH1641:053]
PILEUS
Non dubius fons est nudandi verticis; illud
Officii Medicos instituisse puta.
20. Ian.
[CH1641:054]
OCREA ANGLICANA
Mirandum, si tota domi est; ocreata tot annos
Procinctae similis terra Britanna stetit.
21. Ian.
[CH1641:055]
EADEM
Maeonides juret non [Grieks-]euknêmidas Achaious[-Grieks]
Collatos populis esse, Britanne, tuis.
21. Ian.
[CH1641:056]
ZONA VIRGINALIS
Quae non invitae, geniali nocte, soluta est,
Nescio quid, Thaï, sis, torrida zona fuit.
22. Ian.
[CH1641:057]
CINGULUM
Frustra est innocuum vinclis includere ventrem;
Ni sua cogamus vincula ferre gulam.
22. Ian.
[CH1641:058]
SAETWERCK
Ars haec an furor est telam properare forando
Perdere, quam possit longa forare dies?
22. Ian.
[CH1641:059]
GLOBULI. KNOOPEN
Quid numeras, nove nupte? globos dirumpe morasque:
Rem velit ad globulos nupta redjsse duos.
22. Ian.
[CH1641:060]
SACCUS IN FEMORALIBUS
Grandis origo mea est, et ab Hercule: scite venusti,
Me Iouis incisum vos docuisse femur.
22. Ian.
[CH1641:061]
IDEM
Omni veste placent: peras tantummodo vellet
Hospitibus caupo non placuisse suis.
22. Ian.
[CH1641:062]
VINCULUM PILEI
Quae nos cumque premat vesano more tyrannis,
Non decet haec Batavos vincula ferre meos.
23. Ian.
[CH1641:063]
COLLARE ET TELA SINGULARI
Tandem quis melior mos est hodiernus avito,
Quando libri supplet pagina sola vicem.
23. Ian.
[CH1641:064]
MANICAE REPLICATAE. MANCHETTES
Non homini sit homo? parti pars inuida nostri est.
Rusticior collo noluit esse manus.
24. Ian.
[CH1641:065]
CALCAR
Discite quem stimulum virtus innata requirat;
Si nec Equi justum gloria calcar habet.
24. Ian.
[CH1641:066]
STAPES
Stas, Eques, an pendes? responde: stare sedendo,
Sessor, an hoc melius stando sedere vocas?
24. Ian.
[CH1641:067]
BRACCA
Inter utrumque femur collecta lacinia talem
Fecit, et incauto Bracca reperta fui.
25. Ian.
[CH1641:068]
EQUI SOLEA
Ungula ferrata est, ut eques magnete tenaci
Elapsum fraeno sistere possit equum?
25. Ian.
[CH1641:069]
THORAX FENESTRATUS
Quam male quo solo vitae pretiosa teguntur
Viscera pertusum, crispule Galle, facis!
25. Ian.
[CH1641:070]
IDEM
Qui tremis illustri sectus thorace, videre
Saucius e pugnâ, Galle, redire mihi.
25. Ian.
[CH1641:071]
ANNULUS PURUS
Cedit gemma mihi, quantum superatur imago
Non brevis, aeterni temporis effigie.
25. Ian.
[CH1641:072]
CALCEUS MORE GALLICO. À PONTLEVIS
Qui primo sutor struxisti ponte cothurnum
Prime, super crepidam non sapuisse nego.
25. Ian.
[CH1641:073]
CREPIDA HOLOSERICA
Calceus e pelle est; ego byssea: dixerit ullus,
Cedere Bombycem nobilitate caprae?
25. Ian.
[CH1641:074]
SPEELWERCK
Floribus ornatur pretiosae fimbria telae:
Foeminei textus haec quasi Rhetorica est.
26. Ian.
[CH1641:075]
LECTICA. VEHICULUM AULICUM
Calceus e soccis, e calceis orea crevit;
Omnia nunc, ingens ocrea Rheda, tegit.
27. Ian.
[CH1641:076]
EADEM
Gestaris, non, longa trahis quod syrmata, sed quo
Gesteris, mulier, syrmata longa trahis.
27. Ian.
[CH1641:077]
EADEM
Quod nostro melius mereamur crimine, tempus
Innocuum quatuor dilaceramus equis.
27. Ian.
[CH1641:078]
EADEM DETECTA. CALESCHE
Pertaesas corii Batavos gestatilis arcae,
Cum vacat, et sudum est, en altera quae vehat [Grieks-]argoús[-Grieks].
28. Ian.
[CH1641:079]
RUSTICA
Candida nata fui, cur vivam fusca, rogatur?
Non uno Sol in virgine mense fuit.
28. Ian.
[CH1641:080]
IN AMICAM HYEME RETRORSUM VECTAM
Rideor, Astronomi, caleam quod mense Decembri?
Sol meus in Cancro Iulia anatropica est.
28. Ian.
[CH1641:081]
MOS AULICUS RETRO VEHENDI
Occiput in fronte est: quid mox? expecto deorsum
Ut caput, ut sursum dirigat aula pedes.
28. Ian.
[CH1641:082]
IDEM
Ambulat aula retro: tanto prudentior aulâ
Restio; retrorsum rem facit, aula nihil.
28. Ian.
[CH1641:083]
IDEM
Res Batavum retro coepit sublapsa referri:
Nescio quid pravae sortis in augurio est.
29. Ian.
[CH1641:084]
RHEDA ITERUM
Ridiculum est solum solus si visis amicum:
Tota domus totas coepit adire domos.
29. Ian.
[CH1641:085]
SUDARIUM
Ut naso careas, nec sit pituita molesta,
Non mage me careas quam cute, pelle, poris.
29. Ian.
[CH1641:086]
INTERULA
Quantacumque sient ove vel bombyce superba,
Quantula sint hominum corpora, lina sciunt.
29. Ian.
[CH1641:087]
EADEM
Pectoris ingenui virtus, interprete me, sit
Proxima, candori proxima simplicitas.
30. Ian.
[CH1641:088]
SUDARIUM ITERUM
Candida stillanti succurrunt lintea naso;
Naturâ melius praecipiente, manus.
31. Ian.
[CH1641:089]
IDEM
Linea quae primo violavit stamina mucco,
Non satis emunctae natio naris erat.
31. Ian.
[CH1641:090]
RHEDA ITERUM
Vane furor Podagrae, frustra me compede vincis:
Si claudum prohibes ire, sedebo domum.
3 Feb.
[CH1641:091]
AD BARLAEUM SIMULATO CHARACTERE EPIGRAMMA DE DACTYLO EDENTEM
Lydia? non patior. Scripsisti, Tessela, nequam
Concubiam noctem dactylus ille sapit.
Nec tamen in viduam calamo lusisse supino
Litera, quam simulas, ipsa supina probat.
(5) Dactylus in viduâ per somnum lusit, et absens
Tessela sub prono vate supina fuit.
Iam nimias miserata faces, da Tessela vati,
Cuius et in somno est . . . . . quod digitus.
3. Feb.
[CH1641:092]
CLAVA HOLLANDICA
Praevalet Herculeae Batavum discrimine Clava:
Illa feras potuit vincere, nostra feros.
3. Feb.
[CH1641:093]
FIDES CITHARAE
Si sua quid valeant bene nîrit viscera, mirum
Ni mox harmonice pedere discat ovis.
3. Feb.
[CH1641:094]
EPITAPHIUM STAECKMANNI
Staeckmanni quod humi potuit procumbere, fati
Legibus, hic patriâ conditur, Hospes, humo:
Quanti, disce, viri ; quantum se condere moerens
Frisia visceribus inuidet aegra suis.
(5) Et gestare velit; gestantem quidquid honorum
Arte quis, ingenio vel pietate gerat.
Omnibus ille aditis o1nnes contemsit. acerbo
Hunccine tu raptum funere, Friso, doles?
Sidera restabant: quid ni properasset, adire
(10) Qui nihil hic ultra posset, adire Deum?
9. Feb.
[CH1641:095]
(IN PONTIFICIOS)
Papicolis est pro numine Papa: papae!
9. Feb.
[CH1641:096]
IN GRASWINCKELJ CATILINAM
Quae gravis augusto docte Sallustius aevo
Prodidit insanum verba locuta nefas,
Doctius Hic, Lector, Româque et ab ore rotundo
Hellados ascitis induit eloquiis.
(5) Induit Hic; ne quaere quis Hic; vix Carmine tanti,
Vix toto nomen clauditur orbe viri.
Dic modo, ni manes miseret vexare Latinos,
Ut placitum Belgis pro Cicerone loqui,
Crispe dabis veniam, quae nunc sunt saecla virique,
(10) Post Batavos patriâ primus in historia es.
10. Feb.
[CH1641:097]
IN EFFIGIEM MEAM LIBERIS CINCTAM
Circulus a centro paribus patet intervallis,
Par Patris a centro linea, par et amor.
13. Feb.
[CH1641:098]
IN EANDEM
Ambiat omnigenûm doctos prudentia rerum,
[Grieks-]Enkyklopaidía[-Grieks] est haec Patris Hugenii.
13. Feb.
[CH1641:099]
EMUNCTORIUM LUCERNAE
Qui lucere voles ellychnia, crescere ramos,
Sollicitâ multum suesce putare manu.
13. Feb.
[CH1641:100]
CIRCINUS
Sto pedes et gradior: si poplite flexilis essem,
Exsecti posses dicere crura viri.
13. Feb.
[CH1641:101]
IDEM
Unumquemque meo metiri se pede rectum est:
Unumquemque suo rectius et satius.
13. Feb.
[CH1641:102]
LIGNA FABRILIA
Sylva domus Batavum est; ramis ornata fenestra,
Arboribus strata est area sectilibus.
13. Feb.
[CH1641:103]
SUPERCILIUM CAMINI
Pallia nos dixit fumosi septa camini,
Quem sua circumdant pallia fumus homo.
13. Feb.
[CH1641:104]
PENNA
Plena (quis hoc capiat?) vitâ plumisque volavi;
Mortua et implumis vivo voloque magis.
15. Feb.
[CH1641:105]
EADEM
Anseris, eloquio, vivit post funera virtus:
Officium rostri plurima penna facit.
15. Feb.
[CH1641:106]
SCALPELLUM
Muneris hoc nostri est, totum quod perstrepis orbem
Garrula, et elinguis me sine, Penna, fores.
15. Feb.
[CH1641:107]
THECA CALAMARIA
Si scopus ante oculum est, si tendis Apollinis Arcum,
Tensis ingenii viribus, haec pharetra est.
15. Feb.
[CH1641:108]
ATRAMENTUM
De bene quaesitis gaudet quod tertius haeres,
Saepia mille modis verbificata facit.
16. Feb.
[CH1641:109]
ARENA SCRIPTURAE INSPARSA
Quantula vis haec est, quod te, nigra sepia, subdo;
Arctoum pelagus mollis arena rego.
18. Feb.
[CH1641:110]
EADEM
O curas hominum ! quarum pariendo necesse est
Primos interitus puluere praeuenias.
18. Feb.
[CH1641:111]
FOLLIS
Quis quibus imbutus studiis, a folle monemur
Discere: qui ventos ore flat, aure bibit.
Noctu inter 19. et 20. Feb. per acutissimos
dolores e catarrho in sin. Aur.
[CH1641:112]
IDEM
Follis, ad exemplum Pulmonis ventifer, uno
Dissidet; hic aestum temperat, ille facit.
ut supra.
[CH1641:113]
ULNA
Lege coercetur rerum mensura: quid hoc est,
Quod vitae morum quisque sit ulna suae?
ut supra.
[CH1641:114]
EADEM. IN FALSARIUM
Chaerea dives homo est: ulnarum quippe duarum
Amplexu quantum Chaerea clausit, habet.
ut supra.
[CH1641:115]
VENTILABRUM
Non est solorum decor aut pudor iste Scytharum,
In Batavis ventum vendit hic, alter emit.
ut supra.
[CH1641:116]
VENTILABRUM GALLICUM EX EBORE SCISSILI
Quo ventos excîmus ebur, fateatur, opinor,
E dentiscalpjs Aeolus esse suis.
ut supra.
[CH1641:117]
IN EFFIGIEM INFANTIS BEATAE MARIAE POMUM TENENTIS
O Mali damnande malo, Iustissime, Malum
Eripe foemineâ nunc quoque, Christe, manu.
22. Feb.
[CH1641:118]
AD PODAGRICUM DEBITOREM
Solue fidem, frustra est Podagram praetexere: quid si
Promissis nequeas stare? sedere potes.
23. Feb.
[CH1641:119]
CAPILLI
Tortus hic in fila est sudor: quid, homuncio, turges,
Cuius in excelso est ipsa corona vapor?
1. Mart.
[CH1641:120]
CAPUT
Es, quod es, ingenio: ingenii pretiosa supellex
Hic latet: inferne vivus es; hac es homo.
1. Mart.
[CH1641:121]
OCULI
Quam bene donasset geminam natura fenestram,
Una domo radium si ferat, una domum!
2. Mart.
[CH1641:122]
NASUS
Pictori noceo: neque enim, sine naribus, esset
Cur pictura Rosae cederet aut violae.
2. Mart.
[CH1641:123]
GENA
Ingenium, genus et genium quae prodere possum,
Et soleo, merito sum Gena dicta meo.
7. Mart.
[CH1641:124]
EADEM
Cur bona mala vocor sedes formosa pudoris?
Nempe quod instar habent non mala mala mei.
7. Mart.
[CH1641:125]
SUPERCILIUM
Sylva repellendis praefigitur ardua ventis:
Haec aliquid vento saevius arcet; aquas.
8. Mart.
[CH1641:126]
PALPEBRAE
Cum tenui Natura oculos munivit amictu,
Hoc Homini voluit dicere, Fide Deo.
10. Mart.
[CH1641:127]
(OCULI)
O animi specula, o ktivsew" portenta stupendae,
Vos, ego, qui capitis omnia, non capio.
11. Mart.
[CH1641:128]
CILIA
Quot rigidae stamus lachrimarum in littore setae,
Tot sumus in muscas hostica pila, pili.
11. Mart.
[CH1641:129]
LABRA
Labra virûm verbosa sient; facundius uno
Alloquitur mea me Iulia basiolo.
12. Mart.
[CH1641:130]
EADEM
Imprime suaviolum molli facunda corallo,
Caetera per me sis, Iulia, muta licet.
12. Mart.
[CH1641:131]
IN I. C. ORATIONEM INAUGURALEM ET DE RATIONE
INTERPUNGENDI LIBROS XX. INCERTI
Qui vester Interpunctionibus decem
Implêsse fertur et decem grandes libros,
Expunctionum paginâ quos destruas
Unâ, nec unâ: lucidum mysterii
(5) Specimen stupendi publicus Rhetor dedit.
Concisa Punctis mille, Colis, Commatis,
Ut pulvis, ut minutal, est Oratio.
Aurite rarae testis eloquentiae,
Barlaee, quid testaris? ista publice
(10) Pronunciavit Rhetor, an singultiit?
Et, si resurgat forte fabulator hoc
Aesopus aevo; nonne perculsus, putas,
Miretur inter bestias Piscem loqui?
14. Mart.
[CH1641:132]
LINGUA
Nil opus est montes dirimant aut flumina fines:
Optima Terrarum lingua Geographica est.
15. Mart.
[CH1641:133]
IN POLLICEM STATUAE DUCIS ALBANI. AD HOOFDIUM
Da veniam tua si parce cimelia laudo,
Queis, Hoofdi, ratio detrahit ipsa fidem.
Aeneus Albani pollex nequit esse Tyranni;
Debuit ex illa ferreus esse manu.
16. Mart.
[CH1641:134]
(LINGUA)
Fide cui quis cumque voles: mihi caussa timendi est,
Qua sapiunt homines, fallere; verba dare.
17. Mart.
[CH1641:135]
EADEM
Quaeritur unde siem carnis versatile frustum?
Quot cerebrum format somnia, formo plicas.
17. Mart.
[CH1641:136]
COLLUM
Qui dubitat collum vitae cur copula dicar,
Permittat nodum soluere carnifici.
18. Mart.
[CH1641:137]
HUMERI
Corporis efficiunt humeri tabulata supremi:
Quid caput? impositae nil nisi turris apex.
23. Mart.
[CH1641:138]
CUBITUS
Ni lectum bene pransus amas, dormire sedendo est:
Qui cubitum non vult ire, eat in cubitum.
24. Mart.
[CH1641:139]
BRACHIA
Hasce viden’ chelas, mea lux? non extat amati
Corporis, aut flammae certior ulna meae.
24. Mart.
[CH1641:140]
PALMA ET PUGNUS
Mollia sunt palmae, prae pugno, verbera: refert,
Rhetorice num quis vapulet, an logice.
25. Mart.
[CH1641:141]
BRACHIA ITERUM
Brachia tensa crucem faciunt cum corpore tenso:
Discite, nata cruces corpora nata Cruci.
28. Mart.
[CH1641:142]
CARPUS
Ut collo caruisse caput, vel poplite crura,
Sic poterat carpum non habuisse manus.
29. Mart.
[CH1641:143]
AU PORTUGAL REVOLTÉ
Courage, Portugaiz; paracheuez le cours
Qu’enseigne la raison contre les Tirannies:
Embrassez la leçon, l’exemple et le secours
Des Estats genereux des Prouinces honies.
30. Mart.
[CH1641:144]
MANUS
Si, capere, ingenii est; quidni super omnia membra es,
Omnia cum capias, ingeniosa manus.
1. Apr.
[CH1641:145]
DIGITI
Nil opus est famulis; servos natura cuique
Nascenti totidem contulit ac digitos.
2. Apr.
[CH1641:146]
UNGUES
Pruritum si debellas, impune recides
Quae Deus extremis artubus arma dedit.
3. Apr.
[CH1641:147]
VOLA
Omnis homo est mendax: ego me reperisse putabo
Veracem, si cui forte pilosa vola est.
3. Apr.
[CH1641:148]
(INGRATITUDO)
Seruire gratis est nefas et ingratis.
5. Apr.
[CH1641:149]
IN GELLIAM
Quam bene conjugii sit onus latura probavit
Quae modo deprensa est Gellia [Grieks-]ep’ auto-forooi[-Grieks].
6. Apr.
[CH1641:150]
EPITAPHIUM IULIAE, NULLO SPLENDORE SEPULTAE
Iulia pulchra foris, intus pulcherrima, putri
Pressa situ, jacet hic: pulchrae pulchrique dolete.
O furor, o scelus, o atrox injuria fati,
Tantillum pulchri tantum servare sepulchri!
23. Apr.
[CH1641:151]
EPITAPHIUM LYDIAE, SPLENDIDE SEPULTAE
Lydia foeda foris, intus foedissima, solo
Pulchra situ, jacet hic: pulchrae pulchrique dolete.
O pudor, o scelus, o excors insania saecli,
Tantillum pulchri tantum seruare sepulchri!
25. Apr.
[CH1641:152]
IN AQUAS ODORIFERAS A LEGATO LUSITANIAE DONO MIHI DATAS
Fundit odoratas Batavis Lusitania lymphas;
Et capimus lepidi muneris indicium.
Scilicet hoc liquide voluit salseque monere
Dulcibus, ut salsis auxiliemur aquis.
25. Apr.
[CH1641:153]
EPITAPHIUM IACOBI GEINIJ F.
Aufer, viator, nobili pedem busto;
Hic Artis, hic modestiae penu calcas,
Hic Geinium: qui quid valeret in vivis
Nescîsse mortem mirer? ipse nescivit.
(5) Sin pene scivit ipse, noluit sciri.
Fortasse posteri scient. Sciant porro
Vel nesciant, tam scire Geinius curat,
Quam qui, sciens quod credidit, quod hic scimus
Nescire nos scit, et scientias, artes,
(10) Et omne quo tumemus inscii, fumum,
Et hoc putamen, corpns, et nucem cassam.
Infer viator labili pedem busto;
Non artis aut modestiae penu porro,
Non Geinium: fefellimus: Nihil calcas.
In Castr. ad Gennep. 24. Iuny.
[CH1641:154]
A IAN
Ce squelette vestu d’une toile cirée,
Ce fagottage d’os, ceste vache efflanquée,
Ce rattelier, ce bast, ce busque sans tetons,
Que le diable fuiroit de baiser à tastons,
(5) Est ce ta femme Ian? et à si belle Amie
Dis tu pas les matins, Dieu te garde Momie?
Offelen. 29. Iunii.
[CH1641:155]
Pene virum virgo, genialia gaudia pene,
Pene puerperii Lesbia sensit onus.
Ole, quid effracta de virginitate laboras?
Si quid pene fuit, pene fuisse puta.
(5) Pene quod est, non est: experta sit infinitos;
Pene f . . . . tuo pene futura tua est.
4. Iuly. Offelen.
[CH1641:156]
IN OBSIDIONEM ARCIS GENNEPAE
Concussa crebro tecta, muri, fulmine
Sidunt ruuntque et incidunt sensim sibi,
Ut Arce quâ potitus es potirier
Et exhibere mox quod expugnaveris,
(5) Subire quam superare durius siet,
Et invenire Gennepam, quam vincere.
Invicte Poliorceta, quid porro furis?
Cum veneris, cum viceris, vix videris.
7. Iulii. Offelen.
[CH1641:157]
EPITAPHIUM MICHAELIS MIEREVELDIJ
Aemathiae memor aut Thrasymeni littoris, horre
Quisquis es, et Patriae cladibus illachryma.
Parca virum vitas Pictoris morte peremit,
Arte perempturus quot fuit ille neces.
(5) Aemylium Cannasque puta: Mireveldius istic
Non una Batavûm cum legione jacet.
8. Iuly.
[CH1641:158]
IN EFFIGIEM MEAM A DECREPITO MIREVELDIO PICTAM
O miranda senis Mireveldj dextera, vitam
Vivida quae toties, nunc moribunda dedit!
[CH1641:159]
IN MORTEM PROREGIS HIBERNIAE
Straffordo patriâ Heroi virtute subacto
PerdendUm Patria pro meliore caput
Barbara Proregi (quam non pro Rege!) securis
Amputat. Hoc homines ferre Deosque nefas,
(5) Hoc Mariam, hoc Carolum! nunquam pro plebe maligna,
Pro populo nondum debuit ille mori.
10. Iul. Offelen.
[CH1641:160]
(IN EANDEM)
Straffordus omni laude celsior, fero
Plebis furori dedicans dium caput,
Constantiâ Catone, vel Paeti manu,
Vel sub Nerone Stoïco dignâ sene,
(5) Omnique Stoa, patriae dolor et stupor,
Ut inuidendo clausit exitu diem,
Mortem decoro fecit aggressu leuem;
Scelerisque plectens poenitentiâ reus
Flentem popellum, visus est judex reo
(10) Mortis popello tradere, ut flendi vicem;
Non hanc levis compendii sortem ratus
Iniquitate temporum Deo dari.
O dignus innocentiâ viri vigor,
O sub securi nobilis securitas!
13. Iul. Offelen.
[CH1641:161]
AD ACADEMIAM OXONIENSEM, CUM EPITHALAMIA
NOBILISSIMORUM IUVENUM IN NUPTIAS PRINCIPUM GUILIELMI
AURIACI ET MARIAE BRITANNICAE TRANSMISISSET
Oxonii colles, quos inter Apollinis olim
Festivâ juvenes movimus arma manu,
Arma nec exciti, nec tentatricibus armis,
Nec Batavam vestrâ sollicitante lyram;
(5) Accipite hos hodie cum floribus [Grieks-]antaspasmoús[-Grieks],
Quos superi vestris implicuere Rosis.
Ni foret immensi vis invidiosa profundi,
Ni foret obstantis vasta vorago freti,
Quâ male dividimur, quâ prospectare dirempti
(10) Non ferimur siccas, littora vestra, nives,
Non ferimur quae junxit hymen sociare Batavis
Pectora gentili candidiora nive;
Iret in amplexus plebs non ingloria vatum,
Iret in officium carminis os et amor.
(15) Nunc aliquis de faece virûm qui castra sequuntur
Martia, Phoebaeae transfuga militiae,
Occupo Belgarum partes implere loquentum.
Turba salutantum est una, nec una, manus;
Fessa manus, manus Auriaci confecta labore
(20) Imperii, soli non sibi nata manus,
Sic quoque non nulli [Grieks-]proteleîs[-Grieks] affando poetas
Eminus Auriaco prompta ministerio.
Testor enim, testor, Iuvenes ad maxima nati,
Grandia facundis carmina texta modis,
(25) Carmina, qua patet, ingenti vernacula mundo,
Omnibus aptatum gentibus omne melos,
Auriaco placuisse Patri, placuisse marito
Nobile contractae pignus amicitiae:
Nec satis ille Patrem, nec se satis iste maritum
(30) Credidit aut animi vota peracta sui,
Oxonii fontes, nisi vestro rite sacrata
Tam bona tam sacro murmure sacra forent.
Est aliquid, populi voces et vota tulisse,
Est aliquid nulli displicuisse bono,
(35) Gaudia turbatis vultu retulisse Britannis,
Discussisse Iovis nubila Sole brevi;
Est aliquid procerum plausus vel nobilis Aulae
Moribus ingenuis conciliatus amor;
Terrenis placuisse Deis, placuisse Deabus,
(40) Mille puellarum basia, mille virûm
Blanditias, mille amplexus, longo ordine [Grieks-]chaîre[-Grieks]
Perpetuum plenis elicuisse viis.
Prima maritorum primo libasse cubili
Gaudia, et, unius ni levis interulae
(45) Tutrici praetexta manu cautela fuisset,
Plena maritalis gaudia parta thori:
Plus est, Oxonii colles, plaudente Senatu
Hesperidum fausto nunc Helicone frui,
Propitiisque Deûm quibus est sapientia curae
(50) Numinibus fati culmen adîsse sui.
Fluxa fides populi, fluxa est versatilis aulae
Gratia, et incertae fulgur utrumque spei,
Quod patriae non fortuito delecta Iuventus
Consiliis librae ponderat axe suae,
(55) Collatisque rei priscae praestantibus ad rem
Exemplis, animis, et ratione probat,
Hoc juvat, hoc solidis alte radicibus actis
Credimus aeterni foederis auspicium.
Scilicet his animis Princeps utriusque Iuventae,
(60) Hac Batavae mistâ fidet utrimque manu,
Quasque triumphator vires acquiret eundo
Fulciet Auriacae juncta Britanna cohors:
Cum simulatus hymen, spretique injuria Regis
Ultio cognatae posteritatis erunt.
(65) Hostica germanae turbabunt aequora Classes;
Vulturis huius erit praeda, vel huius Iber.
Ibimus, et Boetin Tamesis Rhenique Mosaeque
Subdere cogemus colla superba jugo,
Et male possessis Domino concedere jussum
(70) Rapta Palatino reddere regna Duci.
Denique et a paucis pacem, quam pernegat Orbi
Efferus, inflexo poscere saepe genu.
Oxonii colles, tanto nos omine rerum
Fata ligant, tantis jungimur auspiciis.
(75) Iungimur? an vanâ lactamur imagine ficti
Foederis, et magnae futilis umbra rei est?
Futilis umbra rei est, nisi qui modo foedera junxit
Ipsa individuus pectora jungat amor,
Iungat hymen, spe major hymen, re magnus, et omni
(80) Parte rei, et nullâ claudus ab interulâ.
En erit illa dies quâ complexanda Batavis
Descendet Patriâ puppe Britanna Venus!
Quâ Zephyri strident, coeli convexa boabunt,
Et maris et terrae turba, Maria venit!
(85) Oxonii cives, si sunt rata foedera, si, quem
Ore probavistis, mente probatur hymen;
Si placet unius moeror frendentis Iberi,
Si Batavo-Britonum gaudia juncta placent,
Exaudite preces Generi, Socerique, Socrusque:
(90) Optatam cunctis accelerate diem.
Flectite non durum Sponsae Socerique Socrusque
Facundis linguae flexibus ingenium.
Omnia speramus, (quid non speremus amantes
Patronis Batavi collibus Oxoniis?)
(95) Omnia speramus, modo tot, sacra nomina, Vates
Potterus totidem Rhetoras esse velit.
In Castris Offelae. 8°. Augusti.
[CH1641:162]
IN MORTEM PULCHERRIMAE MATRONAE ANNAE KILLIGREW
SUB PONTE LONDINENSI SUBMERSAE. 16. IULY 1641.
Impia vis Annam vili clausura sepulchro est:
Non potuit condi nobiliore loco.
Grandia praestanti respondent marmora formae;
Bis deno moriens fornice tecta fuit.
Offelen 10. Aug.
[CH1641:163]
(IN EANDEM)
Qui videt Herculeo stridentem gurgite Solem,
Mane revicturum novit abjsse jubar.
Heu! Britones, instat vestri nox ultima mundi,
Sol subiit vestras non rediturus aquas.
20. Aug.
[CH1641:164]
(IN EANDEM)
Quid Tamisi Lachesique damus, quod ab aequore nostri
Invida commisit plurima Nympha nefas?
Divinâ divam facie et virtutibus Annam
Ascivere suis Numina Numen aquis.
22. Aug.
[CH1641:165]
IOCUS
Non sceleris, Neptune, tui est, de sospite turba
Unica lethales Anna quod hausit aquas:
Quâ placuit gravitate (leves impune natarunt)
Virtutumque suo pondere mersa jacet.
22. Aug.
[CH1641:166]
AEN HAER SCHILDERIJ, IN MYN BESITT
Nu leeft, mijn’ Oly-verw, nu duert voor langhe jaeren:
Uw schoon oorspronckelick dryft in de silte baren,
Verdreven door de dood, vertroetelt en vermoort,
En door haer’ koude hand in Water-verw gesmoort.
22. Aug.
[CH1641:167]
Kenotavfion
Parce supervacuo manes affligere fletu,
Quorum nec latet hic umbra, nec ossa jacent.
Vilis erat Divae tellus, in flumine moesto,
In Terrae lachrimis Anna sepulta fuit.
23. Aug.
[CH1641:168]
IN (ARCIS GENNEPAE) MUNITIONEM DEMOLIENDO INSTITUTAM, AD MILITES
Hoc agedum, si forte capis, vindicta Deorum,
Hoc me, perdendi turba perita, doce;
Quomodo quam nisi delendo non cepimus, Arcem
Servandae ratio proxima destruere est?
24. Aug. Offelen.
[CH1641:169]
(SOMNIUM)
Qui cogitando somnio,
Et somniando cogito,
Vel cogitans, vel somnians;
Implexa cogitatio est,
(5) Et intricatum somnium,
Seu somnians, seu cogitans,
An somniando cogitem,
An cogitando somniem.
Offelen. 2. Sept.
[CH1641:170]
(IN MORTEM ANNAE KILLIGREW)
Vanus, ut extinctâ, dolor, et praeposterus, Annâ est:
Si, quamvis abiit, non obiisse potest.
Credimus extinctam Venerem, si forte per aestum
Ludere gestivit quo fuit orta salo?
2. Sept.
[CH1641:171]
(IN EANDEM)
Causa fuit cur contemptis pulcherrima terris
Anna sub illustri Ponte subivit aquas:
Egressura mali victrix ludibria saecli
Nempe triumphali fornice vecta fuit.
3. Sept.
[CH1641:172]
(IN EANDEM)
Naufrage Pons, Arcus homicidae, jacta maligno
Omine in infausto flumine laeva strues.
Quid primus mihi cumque dolor dictârit acerbi,
Annae fata tui criminis esse nego.
(5) Quin Tethy ignosco. Quid, summo gurgite nantem
Si rapuit? falsa est: credidit esse rosam.
11. Sept. In ’tGoesche diep in anchoris, cum exercitu.
[CH1641:173]
OP DE DOOD VAN VROUW ANNA KILLIGREW
VERDRONCKEN ONDER DE BRUGGE VAN LONDEN DEN 16. IUL. 1641.
Haer Hert was enckel Stael in Eer en Trouw gekloncken,
Haer’ Tuijten enckel Goud, maer die ’t Goud over-bloncken,
Haer’ Lippen hoogh Corael, elck Oogh een Diamant
In kassen van Yvoor op ’t silvre Lijf geplant.
(5) Goud, Silver, Diamant, Yvoor, Stael en Coralen,
All Aerde, trock ter Aerd, en socht om ’t seerst te dalen.
De Ziel, die ’t all alleen vlugg houden kost en vlot,
Verhongert naer het Brood des Hemels, gingh tot God,
En luste niet te drincken:
(10) Hoe sou de romp niet sincken?
Nu leeft Sij rompeloos; maer Gods gerechticheid
Is Borghe voor het pack van ziel en romp bewesen;
En ’thoofd is opwaert aen, God is tot God geresen,
Om ziel en romp tot een en bey ter eewigheid
(15) Het steile pad te wijsen:
Hoe sou de romp niet rijsen?
Assenedae 20. Sept.
[CH1641:174]
VOOR EEN BOECK AEN IOFF. ANNA ROEMERS VEREERT
De schrijver van dit Boeck, beschrijver van dit blad,
Bad Roemers oudste kind syn’ Leserin te wesen:
En, soo sij ’t schrappen will met een’ doorgaende kladd,
Bekent hij voor de hand het vonnis wel gewesen.
(5) Syn voornaem is een C. syn toenaem is een H.
Syn bijnaem, Eewigh vriend van Anna en Tesselscha.
8. Novemb.
[CH1641:175]
AENDE SNEEW
Droogh water, koele woll, witt roet, gehackte veeren,
Weest welkom boven op mijn besten hoed en kleeren,
Ick sie niet hoemen u met reden haten sou,
Die ons van boven brenght de Warmte met de kou.
17. Dec.