Janus Grotius
AD
PETRUM BURMANNUM SECUNDUM,
JACOBI PHILIPPI D’ORVILII
SICULA,
UNA CUM CUMMENTARIO SUO AD
NUMISMATA SICULA,
EDENTEM.
In: Jacobus Philippus d’Orville Sicula.
Ed. Petrus Burmannus Secundus.
Amsterdam 1764.
UBL 428 A 8.
Laeta Selinusiae revirescite germina palmae:
Germina victrices cingere sueta comas.
D’ORVILII genio quos debet docta labores
Posteritas, magnum devenerata virum;
(5) Sicanii monumenta soli, tristesque ruinas;
Eripuit tenebris officiosa manus;
Temporis illa manus domitirx, ditata tropaeis,
Quae simul & proprias adcumulavit opes.
Ingredere auspiciis dudum addiscentibus orbem,
(10) Qua patet, Hyblaeo nectare foete liber.
Jam tibi frugiferas Trinacria porrigit ulnas,
Plaudit & e mediis Himera uterque vadis.
Jam fontes aperire suos Arethusa; virentes
Henna tibi latebras pandere grata parat.
(15) Hic ubi te gremio, liber auree, bina vicissim
Excipient memores numina amica Deae;
Quaeque Leontinos diri Laestrygonis agris,
Quaeque Erycis celsum possidet alma jugum,
Flava Ceres, myrtoque comas ornata Dione,
(20) Numina, quae domino culta fuere tuo.
O quoties non obstuipuit te, gloria vatum,
Cantantem aeternos illa vel illa modos.
Saltabant pariter Nymphae, pariterque legebant
Inplicitura tuum florea serta caput;
(25) Sicelides Nymphae, Dryadesque, & Oreades, & quas
Forte alio plures nomine terra fovet;
Castae omnes, omne Divûm genus & pia cura,
Capripedum insidiis nescia turba capi.
Da veniam, platanos fesso quod iniqua negarit
(30) Urbs vetus, Andromachi quam posuere manus,
Tauromenos, Bembo lustrante, benignior olim;
Da veniam: facti poenituisse patet.
Ingenio decorata tuo viresque resumsit,
Atque iterum arboribus consita vestit humum.
(35) Vivite, frondentes platani, longumque valete,
Tauromenitanis umbra renata locis.
Et tu operae felix, BURMANNE, laboribus istis
Macte, age, D’ORVILIO non minor ipse tuo.
Dum Cyane, tortusque Gelas, dum lenis Anapus,
(40) Hypsaque dum liquidas in mare volvet aquas;
Simichidae calamos dum secula nulla tacebunt,
Stesichorusque gravi carmine notus erit;
Te quoque per populos memorabit, & omnibus oris
D’ORVILIO junctum fama loquetur anus.
JANUS GROTIUS.